> Gedichte und Zitate für alle: Friedrich v. Spee-Trutznachtigall: Die Geschöpff Gottes vverden ausführlicher jhn..... (28)

2020-04-21

Friedrich v. Spee-Trutznachtigall: Die Geschöpff Gottes vverden ausführlicher jhn..... (28)





Die Geschöpff Gottes vverden ausführlicher jhn zu loben
angemahnet

1.

Die Engel Gottes.
Wolauff/ wolauff nun lobet Gott/
Ihr himmel-volck dort oben;
Ihr Engel Gottes Sabaoth/
Der euch so gar erhoben.
Stäts schawet jhr sein angesicht/
O lust/ in lustes brunnen!
All frewd/ vn wun/ all glantz/ vnd licht/
Euch kompt von jhm gerunnen.

2.

Ach daß nur alles weit/ vnd breit
Mit seinem lob erfüllet/
Voll krafft/ vnd macht/ vnd herrligkeit
Von schall/ vnd hall erbrüllet:
Ach preiset jhn mit höchstem schall/
Mit starck/ vnd starckem singen/
Ob schon die welt von hellem knall
Auch solt in stück zerspringen.

3.

Die Himmel vnd jhre Liechter, etc.
Ach lobet Gott jhr himmel klar/
Gewölbet von Crystallen:
Mit sambt den flüssen alle gar/
Welch vber euch noch wallen;
Dan jhr mit wasser wurd bedeckt/
Mit wällen hoch bezogen/
Als euch der Schöpffer außgereckt/
Vnd in die ründ gebogen.

4.

Ey wie so weit/ vnd breites feldt/
Mit fewr/ vnd flamm besaamet!
Ey wie so groß/ vnd reiche zelt/
Die doch auß nichten kamet!
Ey wie so schöner fackel-pracht/
Wie schöne liecht/ vnd sternen/
Wan jhr euch zeiget in der nacht
Im besten schmück von fernen.

5.

Nun lobe Gott du gülden schein/
Du silberglantz im gleichen:
Jch euch O Sonn vnd Mon vermein/
Die welt jhr geht vmbstreichen:
Er euch mit liecht gefüllet hat/
Mit schönheit hoch gezieret:
Drumb billig jhr dan früh/ vnd spat
Ihm allweg jubiliret.

6.

Ach lobet jhn jhr sternelein/
Zur schiltwacht außgeschicket:
So droben ligt in fensterlein/
Vnd fleißig nunder blicket:
Dan er hat euch/ weil er gewolt/
Gemacht zu klaren liechten:
Wan anders er auch wollen solt/
So würdet jhr zu nichten.

7.

Der Lufft, vnd vvas im Lufft zu finden ist.
Ach lobe Gott du reiner lufft/
Du web gar zart gesponnen!
Zu nachts bist nur ein schwartzer tufft/
Biß zu der morgen sonnen:
Da zeigest dich in klarem schein/
Viel weisser als die Schwanen/
Wan schon gleich außgespannet sein
Ihr breite feder-fahnen.

8.

Zu dir viel tausend vögelein
Mit frewd/ vnd jubel schweben/
Zur sang-schul zu dir kommen ein/
Vnd nach dem Cräntzlein streben/
Wer wil die stücklein zehlen all/
So die dan figuriren?
Concerten/ Fugen/ Madrigall/
Auff hundertfalt maniren.

9.

In dir auch fliegen rein vnd zart
Fast aller ding gestalten/
So seind von farben aller art
Vnmercklich abgespalten:
Auch athem süß von blumen all/
All ruch/ vnd krafft der Erden;
All sang/ vnd klang/ all thon vnd schall
In dir gezielet werden.

10.

Seind vnvermischt/ ja doch vermischt/
Vereinigt/ vnd entscheidet:
Der thon/ dem ruch/ vn liecht entwischt
Je eins daß ander meidet.
Waß nur zum jeden sinn gericht/
Waß zum gefühl/ vnd hören/
Waß zum geschmack/ waß zum gesicht
Sich last von keim zerstören.

11.

Auch lobet Gott jhr lufft-gewächß/
Ihr wolcken hoch geboren/
Ihr wind/ zween/ vber fünffmal sechß/
Ihr hagel rund gefroren.
Ihr fliegend flammen/ donner/ blitz/
Comet vns nit gewogen/
Schnee/ reiff/ vnd regen/ kält/ vnd hitz/
Vnd du gefärbet bogen. 

12.

Der schnee da kombt wie sanffte woll/
Von wolcken abgekaimet/
Der hagel wie die perlen voll/
Von kälte starck gelaimet.
Dan weil die tropffen seind im fall/
Vom frost ertappet werden;
Der backt/ vnd härtets wie Crystall/
Da kuglens ab zur erden.

13.

Der weisse taw/ vnd regen klar
Gar lieblich kombt gefliessen;
Der regen-bogen immerdar
Sich spannet ohne schiessen.
Den klaren blitz wir förchten mehr/
Wan groß gewölck sich weget;
Doch lobe Gott nun eben sehr
Waß nur im lufft sich reget.

14.

Er legt den winden flügel an/
Er gürtet jhn die lenden/
Die blitz er heist mit kräfften gan/
Er schüttlet sie von händen.
Mit wetter/ vnd vnwetter starck
Sein allmacht er erzeiget;
Vor jhm erschreckt all bein vnd marck/
Vor jhm sich alles neiget.

15.

Das Meer vnd alle Fisch vnd Schiff etc.
Ach lobe Gott du tieffer grund/
Ohn zaum so gar ergossen:
Du weites meer/ du breiter schlund/
Ohn rigel weit entschlossen.
Ihr grosse walfisch vngeschlacht/
Ihr drachen groß ohn massen/
Die jhr mit vngezäumter macht
Bezwingt all feuchte strassen.

16.

O groß vnd klein geschüptes vieh/
An zahl bist vnermessen:
Der sand am vfer war noch nie
Dir jemahl vbersessen.
Her/ her jhr feucht/ vnd nasse rott/
Die wässer schnell thut spalte/
Vnd jhm/ dem werth- vnd lieben Gott
Nur frewden spiel kombt halten.

17.

Ihr wasserfräwlein wolbekandt/
Den reyen sollet führen:
Auff Harpffen/ Geigen allerhandt/
Die beste seiten rühren.
Wan dan die schön gemahlte schiff
In eyl fürüber fliegen/
Zum Gottes lob wend alle griff/
Da strebet obzusiegen.

18.

Ey da nun jhr vnzahlbar schiff/
(O wasserwald beschoren!)
Euch eben recht ich jetzt betriff/
O bäum zu land geboren!
Ach zäumet auff den vollen trab/
Legt hin die flache sporen/ 
Die flächsen feder spannet ab/
Die zeit bleibt vnverlohren

19.

Zum frewden Fest nun haltet ein
Mit müsset jhr zum Reyen/
Der Schöpffer wil gelobet sein/
Euch wirds zum heyl gedeyen.
Nun hebet an die Lauten griff/
Ihr fräwlein reich von stimmen.
Auch hebet an/ jhr hole schiff/
Gar sänfftiglich zu schwimmen.

20.

Die frembde waaren bringt zu hauff/
Weit vber Meer geholet:
Die frewden fähnlein stecket auff/
Mit farben viel bestrolet.
Da crönet euch mit lorber krauß/
Mit perl/ vnd edelsteinen/
Die bunte täppich spreitet auß/
Vnd herrlich thut erscheinen.

21.

Die Erd vnd alle Erdgevvächs.
Auch lobe Gott mit höchstem preyß/
O kugel wol geründet!
Du tausend-schöner Erden-kräyß/
Im lären lufft gegründet.
Lobt jhn jhr berg/ vnd flaches land/
Lobt jhn jhr stoltze felßen/
Wan euch so gar mit feuchter hand
Die wolcken hoch vmbhälßen.

22.

Auch lobet jhn jhr Ceder-bäum
Auff Bergen hoch entstanden:
Noch holtz/ noch höltzlein sich versäum/
Von ferr/ vnd nächsten landen.
Die zarte zweig nun breitet auß/
Die blättlein last erschiessen;
Euch zeigt in grünen haaren krauß/
So gar zun füssen fliessen.

23.

Auch lobet jhn jhr blümelein/
Viel tausentfalt entsprossen:
Ihr wild/ vnd zahme pfläntzelein/
Mit kühlem taw begossen:
Auch laub vnd graß/ vnd auch getraid/
All früchten auff den felden/
All grün gewächß ohn vnderscheid/
Verborgen weit in wälden/

24.

Ja lobet jhn auch jederzeit
Ihr ertz- vnd glocken-speisen/
Der Erden reiches ingewaidt/
Gold/ silber/ stahl/ vnd eysen.
Dan auch daß kupffer/ zinn/ vnd bley/
Dan schwebel/ stein/ vnd kolen/
So täglich wir gantz keck/ vnd frey
Von klufften tieff erholen.

25.

Nun hetten wir vergessen schier
Der perl/ vnd edelsteinen/
Her/ her Carbunckel/ vnd Sapphir/
Auch müsset jhr erscheinen:
Türckoisen/ vnd Schmaragden rein/
Demanten außerkohren/
Vnd jhr Crystallen mehr gemein
Wie sauber eyß gefrohren.

26.

Auch lobet Gott jhr brünnlein klar/
Ihr bächlein krumb gebogen/
In stätem sprung das gantze jahr/
In stätem gang erzogen.
O stoltze quellen mannigfalt/
O feuchte brüst der erden/
Bey stätem fliessen/ ohn enthalt/
Soll Gott gelobet werden.

27.

Gelobet sey der Schöpffer gut/
Von dem all wässer fliessen;
Der früchten- Oel- vnd Trauben-blut
Den menschen gibt zu niessen.
Er schafft der erden fruchtbarkeit/
All Seelen er ernehret/
Von jhm allein vns allezeit
Groß wolthat widerfähret.

28.

Drumb lobet jhn/ du zahmes vieh/
Du wilde zucht beyneben;
Ihr vögel schnell/ so dort/ vnd hie/
Bald hoch/ bald nider schweben:
Ihr König stoltz/ jhr völcker vil/
Ihr Jüngling grün von jahren;
Ia auch kombt her zu diesem spiel
Ihr Alten greiß von haaren.


Keine Kommentare: